Edisi berkurung dirumah (8)
Oleh Tan Ambo
Lah 25 hari tabilang
Kalua rumah dilarang
Bakuruang dirumah surang2
Dirumah malam jo siang
Bagi Tek Baya bahati lapang
Deknyo maraso sanang
Laki dirumah pagi patang
Indak bajalan indak batandang
Salamo ko hati indak tanang
Laki acok lambek pulang
Alasannyo rapek jo bos gadang
Atau rekanan nan maundang
Curiga juo kadang-kadang
Laki-laki aka e panjang
Sadang padusi sampik kalang
Ka laki suko mamburangsang
Laki dirumah sahari pentang
Bisa juo bangkik berang
Laki wakatu e lai luang
Cuma duduak2 mangangkang
Main hp galak surang
Dicaliak bantuak urang dalang
Karajo rumah sambuah angkang
Manolong laki pantang
Mintak tolong mangubak bawang
Matonyo padiah mampasiang
Dimintak bantu mambasuah talenang
Alasannyo takuik tangan baarang
Ba a bini indak kaberang
Mandanga jawek laki tempang
Apolai kandak sagudang
Minggu lalu mintak randang
Sudah tu buek an sup udang
Gulai baga jo gulai tunjang
Lah mancandu sajak bujang
Tiok hari mintak buekkan anyang
Nan suko bana rakik kacang
Sarato karupuak Palembang
Karupuak jangek dek laki e kurang
Ado lo Tek Baya nan gamang
Kalau lakinyo padagang
Atau karajonyo batukang
Jo sopir oto manambang
Kini panghasilan ilang
Pangaluaran tatap gadang
Kauangan indak saimbang
Suok jadi kabalakang
Kok indak ado bantuan datang
Tantu bisa mati tagang
Capeklah korona ko tabang
Hati bisa maraso tanang
Bausaho indak tahalang
Ka musajik bisa sumbayang
